US ko juda hoa bhi zamana bohat hoa

 

اس کو جدا ھوئے بھی زمانہ بہت ھوا 

اب کیا کہیں یہ قصہ پرانا بہت ھوا 

ڈھلتی نہ تھی کسی بھی جتن سے شب فراق 

اے مرگ ناگہاں ترا آنا بہت ھوا 

ھم خلد سے نکل تو گئے ھیں پر اے خدا 

اتنے سے واقعے کا فسانہ بہت ھوا 

اب ھم ھیں اور سارے زمانے کی دشمنی 

اس سے ذرا سا ربط بڑھانا بہت ھوا 

اب کیوں نہ زندگی پہ محبت کو وار دیں 

اس عاشقی میں جان سے جانا بہت ھوا 

اب تک تو دل کا دل سے تعارف نہ ھوسکا 

مانا کہ اس سے ملنا ملانا بہت ھوا 

کیا کیا نہ ھم خراب ھوئے ھیں مگر یہ دل 

اے یاد ! یار تیرا ٹھکانہ بہت ھوا 

کہتا تھا ناصحوں سے مرے منہ نہ آئیو 

پھر کیا تھا ایک ھو کا بہانہ بہت ھوا 

لو پھر ترے لبوں پہ اُسی بے وفا کا ذکر 

احمد فرازؔ تجھ سے کہا نا ! بہت ھوا